– ‘હર ઘર તિરંગા’ અભિયાન હેઠળ દેશભરમાં તિરંગા લગાવવામાં આવી રહ્યા છે ત્યારે દેશમાં અસામાજિક તત્વોની આવી હરકતો પણ સામે આવી રહી છે
જમ્મુ-કાશ્મીરના ડોડા પોલીસે તિરંગાનું અપમાન કરવા બદલ એક 25 વર્ષીય શખ્સની ધરપકડ કરી લીધી છે.આરોપીની ઓળખ ઉમૈર અહમદ તરીકે થઇ છે.સોશિયલ મીડિયા પર એક વિડીયો વાયરલ થયા બાદ ડોડા પોલીસે ગુનો દાખલ કરીને ધરપકડ કરી લીધી હતી.આરોપી તિરંગાથી ગાડીની સફાઈ કરી રહ્યો હતો.
ઉમૈર અહમદ એક વર્કશોપમાં મેકેનિક તરીકે કામ કરતો હતો.જ્યાં તે તિરંગા વડે સાફસફાઈ કરી રહ્યો હતો.તેની આ હરકતનો વિડીયો સોશિયલ મીડિયા પર વાયરલ થઇ ગયો હતો.જે બાદ પોલીસે ગુનો દાખલ કરીને કાર્યવાહી કરી આરોપીની ધરપકડ કરી લીધી હતી.ડોડા પોલીસે જણાવ્યું હતું કે, સોશિયલ મીડિયા પર રાષ્ટ્રધ્વજને અપમાનિત કરવાનો એક વિડીયો વાયરલ થયો હતો.આ ઘટનામાં પોલીસે ત્વરિત કાર્યવાહી કરીને એફઆઈઆર દાખલ કરી હતી અને રાષ્ટ્ર્રધ્વજનું અપમાન કરનાર શખ્સની ધરપકડ કરી લીધી હતી.તેનું નામ ઉમૈર અહમદ છે.પોલીસે જણાવ્યું કે, આરોપી વિરુદ્ધ રાષ્ટ્રીય સન્માનના અપમાન સબંધિત અધિનિયમની ધારા 2 હેઠળ કેસ દાખલ કરવામાં આવ્યો છે.
બીજી તરફ, ઉત્તર પ્રદેશમાં રાષ્ટ્રધ્વજના અપમાનનો વધુ એક કિસ્સો સામે આવ્યો છે.યુપી પોલીસે બહરાઈચ જિલ્લામાંથી અસલમ અને શાહવાન નામના 2 આરોપીઓની ધરપકડ કરી છે.આ બંને પર રાષ્ટ્રધ્વજ ફાડીને તેની જગ્યાએ લીલો ઝંડો લગાવવાનો આરોપ છે.પોલીસે જણાવ્યું કે, એક સરકારી પાણીની ટાંકી પરથી રાષ્ટ્રધ્વજ ઉતારીને લીલો ઝંડો લગાવવાની ઘટના સામે આવી હતી.જે મામલે બે ઈસમોની ધરપકડ કરી લેવામાં આવી છે.બંને વિરુદ્ધ સબંધિત ધારાઓ હેઠળ કેસ દાખલ કરવામાં આવ્યો છે.
ઉલ્લેખનીય છે કે આ પહેલાં ઉત્તર પ્રદેશના કુશીનગર જિલ્લામાં એક ઘરે પાકિસ્તાનનો રાષ્ટ્રધ્વજ ફરકાવવાનો મામલો સામે આવ્યો હતો.સલમાન નામના એક ઇસમે પોતાના ઘર પર પાકિસ્તાનનો ઝંડો ફરકાવ્યો હતો.જેનો વિડીયો સ્થાનિક સ્તરે સોશિયલ મીડિયા પર વાયરલ થઇ ગયા બાદ લોકોમાં આક્રોશ ફાટી નીકળ્યો હતો.જે બાદ પોલીસને જાણ કરવામાં આવતા પોલીસે ફરિયાદ દાખલ કરીને કાર્યવાહી કરી હતી અને આરોપીની ધરપકડ કરી લીધી હતી.
તદુપરાંત થોડા દિવસો અગાઉ નવસારીમાં એક મુસ્લિમ સગીરે ઇન્સ્ટાગ્રામ ડીપી ઉપર પાકિસ્તાનનો ઝંડો મૂકી દીધો હતો.જેના સ્ક્રીનશોટ સોશિયલ મીડિયા પર વાયરલ થઇ ગયા બાદ પોલીસે કાર્યવાહી શરૂ કરી હતી.જે બાદ સગીરના પિતાએ માફીનામું લખી આપ્યું હતું.
